A carreira do 24 de maio reunirá no circuíto de Bértoa a figuras coma Juanjo Moll, Perfecto Calviño ou os locais Dany Castro e Daniel Mariño

Perfecto Calviño, Maikel Vilariño, Sergio Cancela, Daniel Gorín, Dany Castro, Daniel Mariño, Juanjo Moll son algúns dos 70 pilotos, todos eles de primeiro nivel, que teñen confirmada a súa participación no 1º Autocross organizado pola Escudaría Máis Motor. O presidente da entidade, Juan Puga, subliñou que “todos os pilotos punteiros van estar presentes”.

SAMSUNG CAMERA PICTURESA do sábado 24 será á cuarta proba puntuable para o Campionato Galego de Autocross, e nesta primeira carreira da tempada en Carballo os participantes terán a ocasión de comprobar a efectividade das actuacións realizadas no circuíto de Bértoa, dende a mellora dos espazos e a seguridade do público ata a creación do abastecemento de auga para os vestiarios ou a mellora dos valados e do podio. “É a primeira vez que o circuíto está tan perfecto”, manifestou o vicepresidente de Máis Motor, Iván René Barreiro, na presentación oficial da carreira, que tivo lugar hoxe pola mañá na Casa do Concello de Carballo.

A escudaría anfitriona ten postas grandes esperanzas nos seus pilotos. Así, Dany Castro loitará polas primeiras prazas na categoría de -1.600cc, e Daniel Mariño tamén pelexará por un posto no podio en kartcross. Os representantes de Máis Motor, entre os que tamén se atopaba Diego Iglesias, expresaron o seu agradecemento ao Concello de Carballo, aos colaboradores e aos patrocinadores, pero dun xeito especial destacaron o traballo dos máis de 70 voluntarios e voluntarias para que esta carreira inaugural da tempada no circuíto de Bértoa sexa todo un éxito.

Pola súa banda, o concelleiro de Deporte, Marcos Trigo, quixo resaltar que, malia tratarse dunha escudaría de recente creación, Máis Motor “conta con xente de sobrada experiencia”. De mesmo xeito, o alcalde, Evencio Ferrero, apuntou que na directiva hai persoas “que lle teñen dedicado moitas horas ao mundo do motor”, polo que confía en que a carreira sexa un éxito, especialmente “porque é unha actividade deportiva que normalmente reúne a moitísima xente”. Por último, desexou a vitoria para os pilotos locais para que poidan subir na clasificación do Campionato Galego.

No acto de hoxe, a Escudaría Máis Motor deu a coñecer os horarios da proba, que resumimos no seguinte cadro.

Data Horario Programa
    

 

 

 

 

 

24/MAIO

09:00 a 11:00 Verific. Administrativas Clase I, II, III e IV
09:15 a 11:15 Verific. Tecnicas  Clase I, II, III e IV
11:45 Publicación lista de autorizados a toma-la saída Clase I, II, III, IV
12.00 Saída adestramentos -1.600 c.c.
12.30 Saída adestramentos +1.600 c.c.
13.00 Saída adestramentos Kart-Cross
13.30 Saída adestramentos 4×4
15.30 Semifinais -1.600 c.c.
16.00 Semifinais +1.600 c.c.
16.30 Semifinais Kart-Cross
17.00 Semifinais 4×4
17.15 Final B -1.600 c.c.  
17.35 Final B +1600 c.c.  
18.00 Final B Kart-Cross  
18.20 Final -1.600 c.c.
18.40 Final +1.600 c.c.
19.00 Final Kart-Cross
19.20 Final 4×4
19:30 Publicación de resultados según conclúan as finais
De seguido Rolda de prensa dos vencedores das catro categorías
De seguido Entrega de premios e trofeos

 

A nova entidade pretende converter Carballo na capital galega do automobilismo, e con esa intención traballa xa na organización de carreiras, cursos, charlas e todo tipo de actividades que contribúan a espallar a afección polos deportes do motor.